നിര്‍മ്മാതാവ് സിനിമ ചര്‍ച്ച ചെയ്യാന്‍ വീട്ടിലേക്ക് വിളിച്ചു; വീട്ടിലെത്തിയതും വസ്ത്രങ്ങള്‍ വലിച്ചു കീറി, കയിപ്പിടിച്ചു; നടിയുടെ വെളിപ്പെടുത്തല്‍

സിനിമാ മേഖലയിലെ പീഡന കഥകള്‍ പുതുമയല്ല. എങ്കിലും അത് എത്രമാത്രം പുറം ലോകം അറിയുന്നു എന്നത് ഒരു പുതുമയാണ്. ഈ തലമുറയില്‍ പല പുതുമുഖ നടിമാരും അവര്‍ക്ക് നേരിടേണ്ടി വന്നിട്ടുള്ള പീഡനകഥകള്‍ ധൈര്യത്തോടെ വിളിച്ചു പറഞ്ഞിട്ടുണ്ട്. ഏറ്റവും പുതിയതായി വന്നിരിക്കുന്ന വാര്‍ത്ത ഇതാണ്. നിര്‍മ്മാതാവ് പീഡിപ്പിക്കാന്‍ ശ്രമിച്ചുവെന്ന് നടി ഗായത്രി ഗുപ്ത. സിനിമാ രംഗത്ത് വലിയ സ്വാധീനമുള്ള ഒരു നിര്‍മ്മാതാവ് വീട്ടില്‍ വച്ച് തന്നെ പീഡിപ്പിക്കാന്‍ ശ്രമിച്ചുവെന്നും അന്ന് തലനാരിഴയ്ക്കാണ് രക്ഷപെട്ടതെന്നും ഗായത്രി ഗുപ്ത വെളിപ്പെടുത്തി. അടുത്തിടെ ഹിറ്റ് ചാര്‍ട്ടില്‍ ഇടം നേടിയ ഫിദ ഉള്‍പ്പെടെയുള്ള ചിത്രങ്ങളിലെ താരമാണ് ഗായത്രി.

സംഭവത്തെക്കുറിച്ച് ഗായത്രി വിശദീകരിക്കുന്നത് ഇങ്ങനെ, ഒരു സിനിമ തുടങ്ങാനിരിക്കെ അതിന്റെ നിര്‍മ്മാതാവ് വീട്ടിലേക്ക് വിളിച്ചു. വീട്ടിലെത്തിയതും അയാള്‍ എന്നെ കയറിപ്പിടിച്ചു. വസ്ത്രങ്ങള്‍ വലിച്ചു കീറുകയും ബലാത്സംഗം ചെയ്യാന്‍ ശ്രമിക്കുകയും ചെയ്തു. പല നടിമാരും തന്നോട് സഹകരിച്ചിട്ടുണ്ടെന്നും അവര്‍ അങ്ങനെയാണ് സിനിമയില്‍ ഉയരങ്ങള്‍ കീഴടക്കിയതെന്നും അയാള്‍ പറഞ്ഞതായും ഗായത്രി പറഞ്ഞു. അയാള്‍ നിന്ന് രക്ഷപെട്ടോടിയ താന്‍ പിന്നീട് ആ സിനിമ തന്നെ ഉപേക്ഷിച്ചതായി ഗായത്രി പറഞ്ഞു.

കിടപ്പറ പങ്കിടാന്‍ പലരും ലക്ഷങ്ങള്‍ വാഗ്ദാനം ചെയ്തു. എന്നാല്‍ ആത്മാഭിമാനം പണയപ്പെടുത്തി തനിക്ക് സിനിമയില്‍ ഒന്നുമാകേണ്ടെന്നാണ് അവരോടൊക്കെ പറഞ്ഞത്. അഭിനയത്തില്‍ നിന്ന് വീട്ടുകാര്‍ വിലക്കുമോ എന്ന് ഭയന്നാണ് അന്ന് ഇക്കാര്യങ്ങള്‍ പറയാതിരുന്നതെന്നും ഗായത്രി പറഞ്ഞു. സിനിമയില്‍ അവസരം നല്‍കണമെങ്കില്‍ കിടക്ക പങ്കിടണമെന്ന് പല നിര്‍മ്മാതാക്കളും സംവിധായകരും പറഞ്ഞിട്ടുണ്ട്. അവസരം നല്‍കിയാല്‍ തനിക്കെന്താണ് നേട്ടമെന്നാണ് ഒരു നിര്‍മ്മാതാവ് ചോദിച്ചത്. കിടക്ക പങ്കിടണമെന്നതായിരുന്നു അയാളുടെ ആവശ്യമെന്നും ഗായത്രി പറഞ്ഞു.